Dumadine Kutha
Pekalongan
Kacariyos kompeni Walanda
taksih cumondhok ing Batavia ingkang ndadosaken gesangipun rakyat kita rumaos
katindhes. Awit saking punika Sultan Agung Hanyakrakusuma, raja ing Mataram
mbikak pendadaran prajurit enggal kangge nambahi kekiyatan supados saged mbirat
penjajah kompeni Walanda saking bumi Nuswantara.
Satunggaling mudha ingkang
bagus, gagah lan prakosa inggih punika Jaka Bau saking padhepokan Kesesi rumaos
kegigah manahipun badhe tumut pendadaran prajurit ing Mataram. Kanthi donga
pangestu saking tiyang sepuhipun kekalih, Ki Ageng Cempaluk dalah Nyai Gendari,
Jaka Bau bidhal dhateng Praja Mataram. Sowanipun Jaka Bau ing Mataram ngepasi
wontenipun perkawis ingkang dipundamel dening Weling Kuning sakadang ingkang
mbendung lepen kedhung segawok saengga njalari banjir ing tlatah sakiwa
tengenipun lepen punika. Kanjeng Sultan Mataram kersa nampi Jaka Bau,nanging
Jaka Bau kedah saged numpes Weling Kuning Sakadang.
Saking pitulunganipun Rara
Miranti, rayinipun Weling Kuning, pusaka pedhang Suwedhang minangka piandelipun
Weling Kuning saged kapendhet dening Jaka Bau. Kanthi pedhang Suwedhang punika
Weling Kuning sakadang saged kabrastha dening Jaka Bau. Jasadipun Weling Kuning
sakadang pating glethak, kados bathang, mila papan punika dipunwastani Batang.
Jaka Bau saged unggul ing
jurit, Jaka Bau winisuda dados lurahing tamtama ing Mataram, nanging Jaka Bau
pinaringan jejibahan langkung awrat inggih punika kinen mboyong Rantamsari
saking desa Kali Salak minangka selir Raja. Sasampunipun Jaka Bau pepanggihan
kaliyan Rantamsari, kekalihipun sami-sami nandang asmara, mila Jaka Bau kedah
goroh lan ngapusi dhateng Sultan Agung Hanyakrakusuma. Sultan rumaos
dipuncidrani dening Jaka Bau, minangka ukumanipun Jaka Bau kedah babat alas
Gambiran, wana ingkang kebak kewan-kewan galak, jim peri peprayangan ingkang
wengis. Katekan Jaka Bau para dhemit sing manggon ing alas Gambiran padha
pating cekikik ngece. Kanthi tapa ngalong lan pambiyantunipun Ki Ageng
Cempaluk, Jaka Bau saged mbabad alas Gambiran. Dening Sultan Mataram alas
Gambiran ingkang sampun kababad dening Jaka Bau dipunwastani Pekalongan.
No comments:
Post a Comment